ABŞ və Rusiya prezidentləri Donald Tramp və Vladimir Putinin Alyaskada görüşü ərəfəsində Ukrayna və onun Avropadakı müttəfiqləri Vaşinqtonun Kiyevin maraqlarını “sülh” imici və Trampa Nobel mükafatı qazandıra biləcək razılaşma naminə qurban verə biləcəyindən narahatdırlar. Buna görə də onlar öz “qırmızı xətləri”ni müəyyən etməyə çalışırlar.

Press-fakt xəbər verir ki, bu barədə “Politico” nəşri yazıb.

Nəşrin məlumatına görə, Ukraynanın Rusiya ilə münaqişənin həlli çərçivəsində beş əsas tələbi var:

1. Ərazi güzəştləri olmadan davamlı atəşkəsi təmin edəcək razılaşma.

Kiyev sərhədlərlə bağlı mürəkkəb məsələləri yalnız atəşkəsdən sonra müzakirə etməyə hazır olduğunu bildirir. Moskva isə atəşkəs elan edilməzdən əvvəl qoşunların geri çəkilməsində israr edir.

2. Təzminatlar.

Ukrayna Rusiyanın dəymiş ziyanı ödəməsini istəyir. Politico-nun yazdığına görə, bu məbləğ 500 milyard dollardan 1 trilyon dollara qədər qiymətləndirilir. Avropanın əlində isə azı 200 milyard dollar dondurulmuş Rusiya aktivi var.

3. Təhlükəsizlik zəmanətləri.

Əvvəllər Kiyev NATO üzvlüyündə israr edirdi, lakin Tramp bu ssenarini istisna etdikdən sonra Ukrayna əvəzində başqa təminatlar almağa çalışır. Prezident Volodimir Zelenski vurğulayıb ki, ölkə belə zəmanətlər əldə etməyənədək Rusiyaya qarşı sanksiyalar qüvvədə qalmalıdır.

4. Sanksiyaların saxlanılması.

Ukrayna, Trampın Rusiyaya qarşı məhdudiyyətləri aradan qaldıra biləcəyindən ehtiyat edir. Moskva isə öz növbəsində, bu sanksiyaları “qanunsuz” adlandıraraq onların ləğvini tələb edir.

5. Əsir və uşaqların geri qaytarılması.

Məhbus mübadiləsi Moskva və Kiyev arasında son birbaşa danışıqlarda nəticə əldə edilən yeganə məsələ olub. Bu yay həm əsir, həm də həlak olmuş hərbçilərin meyitlərinin mübadiləsi prosesi fəallaşıb.