ABŞ Prezidenti Donald Tramp ukraynalı həmkarı Volodimir Zelenski ilə bağlı qapılar arxasında danışdıqdan sonra bu gün Oval kabinetdəki tədbirlərin çox uğurlu olduğunu bildirib.

Ağ Ev dövlət başçısının çıxışını yayımlayır.

Tramp vurğulayıb ki, o, Avropa İttifaqı liderləri və Zelenski ilə görüşdən sonra Rusiya ilə üçtərəfli görüşə səbəb olacaq razılaşmaların əldə olunacağını gözləyir.

ABŞ prezidenti görüşdən əvvəl deyib: "Bu gün masa ətrafında toplaşanlardan daha güclü insanların olub-olmadığını bilmirəm. Rusiya Ukraynaya təhlükəsizlik zəmanətinin verilməsi ilə razılaşıb”.

Tramp həmçinin qeyd edib ki, tərəflər mümkün ərazi mübadiləsi və təmas xəttindəki "ağrı"lı vəziyyəti müzakirə edəcəklər.

ABŞ Prezidenti Donald Tramp Rusiya lideri Vladimir Putin və Volodimir Zelenski ilə üçtərəfli görüşün baş tutacağına əminliyini ifadə edib, yeganə sual onun nə vaxt keçiriləcəyidir.

"Bunu təşkil etdiyimiz zaman düşünürəm ki, məhz onda, əgər olmasa, həqiqətən müsbət addımlar görəcəyik", - o deyib.

***

Vaşinqtonda ABŞ və Ukrayna prezidentləri Donald Trampla Volodimir Zelenski görüşüb.  Ağ Ev görüşü birbaşa yayımlayıb.

Press-fakt-ın məlumatına görə, görüşdə Tramp bildirib ki, Rusiya-Ukrayna münaqişəsinin həllində irəliləyiş görür. O, Rusiya lideri Vladimir Putinlə Alyaskada görüşünü xatırladıb və bildirib ki, indi vəziyyəti həll etmək üçün əla fürsətdir.

Donald Tramp bildirib ki, ABŞ Ukraynaya təhlükəsizlik zəmanətlərinin verilməsində iştirak edəcək.

Tramp Avropa ölkələrinin də zəmanət məsələsində iştirak edəcəyini vurğulayıb.

"Təhlükəsizlik məsələlərində çoxlu kömək olacaq. Bu, yaxşı haldır. Onlar (Avropa-red.) birinci müdafiə xəttidir, çünki onlar oradadırlar, lakin biz də onlara kömək edəcəyik", - ABŞ Prezidenti bildirib.

ABŞ Prezidenti Donald Tramp Ukraynada sülh razılaşmasından əvvəl atəşkəsin əldə olunacağına inanmır.

Trampın sözlərinə görə, Ukraynada atəşkəsə artıq ehtiyac yoxdur və məqsəd müvəqqəti atəşkəs deyil, uzunmüddətli sülhdür.

"Mən atəşkəsin olacağını düşünmürəm. Onlar döyüşərkən biz sülh üçün səy göstərməyə razılaşa bilərik", - ABŞ Prezidenti deyib.

O, Kiyevin Amerika silahlarının alınması ilə bağlı problemlərinin olduğunu da vurğulayıb.

ABŞ Prezidenti Donald Tramp Ukrayna lideri Volodimir Zelenski ilə görüşdən dərhal sonra rusiyalı həmkarı Vladimir Putinə zəng edəcəyini bildirib.

ABŞ Prezidenti Rusiya, ABŞ və Ukrayna arasında üçtərəfli görüşün mümkünlüyünə də əmin olduğunu bildirib.

Zelenski öz növbəsində Trampa Ukraynada sülhün bərqərar olması üçün göstərdiyi səylərə görə təşəkkür edib. Ukrayna Prezidenti Putinə yazdığı məktuba görə həyat yoldaşı Melani Trampa da minnətdarlığını ifadə edib.

Jurnalistin sualına cavab olaraq, Ukrayna Prezidenti Volodimir Zelenski ölkədə prezident seçkiləri keçirməyə hazır olduğunu bildirib.

Lakin Zelenskinin fikrincə, bunun üçün döyüş əməliyyatlarının dayandırılması lazımdır.

"Biz bunu təhlükəsizliyimizin təmin edildiyi şəraitdə etməliyik. Açıq demokratik seçkilər keçirmək üçün atəşkəs lazımdır", - Ukrayna Prezidenti vurğulayıb.

Jurnalistlərdən biri Zelenskiyə geyimi ilə bağlı sual ünvanlayıb. Onun bu geyimini bəyəndiyini və çox yaxşı göründüyünü bildirib. Tramp da jurnalistin bu fikri ilə razılaşdığını bildirib. Hətta, Trampın Zelenskini qarşılama kadrlarında da jestlərindən onun geyimini bəyəndiyi hiss olunub.

Zelenski isə gülərək belə cavab verib: “Mən libasımı dəyişmişəm amma, siz yox”.

Görüşdə ABŞ tərəfdən dövlət katibi Marko Rubio, vitse-prezident Cey Di Vens, eləcə də xüsusi elçi Stiv Uitkoff, Ukrayna tərəfdən isə Ukrayna Prezident Aparatının rəhbəri Andrey Yermak və Milli Təhlükəsizlik və Müdafiə Şurasının katibi Rustem Umerov iştirak edib.

***

Vaşinqtonda ABŞ və Ukrayna prezidentləri Donald Trampla Volodimir Zelenskinin görüşü başlayıb.

 Ağ Ev görüşü birbaşa yayımlayır.

Birgə şəkil çəkdirdikdən və mətbuata şərhlərdən sonra liderlər binaya daxil olublar.

Jurnalistin Ukrayna xalqına nə deyəcəyini soruşduqda Tramp belə cavab verib: “Biz onları sevirik”.

Görüşdə ABŞ tərəfdən dövlət katibi Marko Rubio, vitse-prezident Cey Di Vens, eləcə də xüsusi elçi Stiv Uitkoff, Ukrayna tərəfdən isə Ukrayna Prezident Aparatının rəhbəri Andrey Yermak və Milli Təhlükəsizlik və Müdafiə Şurasının katibi Rustem Umerov iştirak edir.

Ukrayna Prezidenti amerikalı həmkarı Donald Trampla görüşdən əvvəl Finlandiya, Böyük Britaniya, İtaliya və Avropa Komissiyasının liderləri və NATO-nun Baş katibi ilə mövqelərini razılaşdırdığını bildirib.