Avqustun 29-na keçən gecə Ukraynanın müxtəlif bölgələri yenidən Rusiyanın dron və raket hücumuna məruz qalıb. Ukrayna Hərbi Hava Qüvvələrinin məlumatına görə, 68 drondan 46-sı vurulub. Lakin 22 PUA doqquz ərazidə hədəfə dəyib.

Dnepropetrovsk vilayətinin Sinelnikovski rayonunda iki nəfər ölüb, bir nəfər yaralanıb. Dnepr şəhərində isə iki yaralıdan biri ağır vəziyyətdədir. Hücumlar nəticəsində bir sıra obyektlərdə yanğın baş verib. Xerson vilayətində iki nəfər ölüb, doqquz nəfər yaralanıb. Sumı vilayətində isə qadın xəsarət alıb, mülki infrastruktur zədələnib.

Rusiyanın 28 avqustda səhər saatlarında Kiyevə endirdiyi raket və pilotsuz aparat hücumlarının nəticəsində ölənlərin sayı artıb. Kiyev şəhər hərbi administrasiyasının rəhbəri Timur Tkaçenko gecə saatlarında bildirib ki, daha bir nəfərin cəsədi dağıntılar altından çıxarılıb. Bununla da paytaxtda həyatını itirənlərin sayı 23 nəfərə çatıb. Onların arasında dörd uşaq da var.

Ən ağır itki Darniç rayonunda olub — beşmərtəbəli yaşayış binasının dağıntıları altında ümumilikdə 22 nəfərin meyiti tapılıb. Xilasetmə işləri davam edir, xilasedicilər üç nəfərin hələ də dağıntılar altında ola biləcəyini ehtimal edirlər. Kiyev meri Vitali Kliçko bildirib ki, ümumilikdə 63 nəfər xəsarət alıb, onlardan 35-i xəstəxanalara yerləşdirilib.

225 bina zədələnib, beynəlxalq qurumların ofisləri də hədəfə düşüb Şəhər rəhbərliyi təsdiqləyib ki, hücum nəticəsində 225 yaşayış binası müxtəlif dərəcəli ziyan görüb. Dağıntılar arasında Avropa İttifaqının nümayəndəliyinin və “Azadlıq Radiosu”nun Kiyev bürosunun binaları da var. ABŞ-nin Kiyevdəki səfirliyi hücumu qətiyyətlə pisləyib: “Zərbələr mülki obyektlərə qarşı yönəlib və bu qəbuledilməzdir. Onlar dərhal dayandırılmalıdır. Biz qurbanların ailələrinə dərin hüznlə başsağlığı veririk. Prezident Tramp da bildirib ki, öldürülmələr dayandırılmalı, tərəflər danışıqlar masasına qayıtmalıdır”.

Avropa İttifaqı rəsmiləri də Rusiyanın hərəkətlərini kəskin tənqid edərək, Moskvanın sülh istəyi barədə bəyanatlarının əsl niyyətlə uzlaşmadığını vurğulayıblar. Ukrayna hakimiyyətinin açıqlamasına görə, yalnız 28 avqust hücumu zamanı Rusiya ölkə ərazisinə 600-dən çox raket və pilotsuz aparat buraxıb. Rusiyanın Müdafiə Nazirliyi isə gündəlik hesabatında Kiyev hücumunu ayrıca qeyd etməyib, yalnız “hərbi sənaye müəssisələri və aviasiya bazalarının” vurulduğunu iddia edib.

Press-fakt