Dünyaca məşhur “Bloomberg” nəşri Rusiya prezidenti Vladimir Putinlə bağlı hesabat xarakterli geniş məqalə dərc edib.
Məqalədə Putinin son 20 illik hakimiyyəti dövründə məhz onun idarəçiliyi sayəsində Rusiyanın əldə etdiyi strateji xarakterli uğurlardan söhbət açılır.
“Bloomberg” yazır ki, Putinin bu illər ərzindəki fəaliyyətini ümumiləşdirəndə ortaya çıxan ən əhəmiyyətli nəticə odur ki, onun idarəçiliyi sayəsində Rusiya heç də böyük olmayan büdcəsilə dünyadakı geosiyasi nüfuzunu xeyli dərəcədə artırmağa nail olub.
Nəşr xüsusi olaraq qeyd edir ki, ABŞ-ın təkcə hərbi xərcləri Rusiyanın ümumilikdə, bütün xərclərini dəfələrlə üstələməsinə baxmayaraq, Rusiya Yaxın Şərqdə başlıca, aparıcı söz sahibinə çevrilməyə nail olub. 
Hətta bununla yanaşı Afrikada da nüfuzunu artıra bilib: “Rusiya yenidən Yaxın Şərqdə əsas gücə çevrilib və indi də öz təsirini Afrikaya doğru genişləndirir”.



Bu isə Putinin ölkənin maliyyə resurslarından və imkanlarından ABŞ adminstrasiyası ilə müqayisədə daha səmərəli istifadə etməsinin göstəricisi sayılır.
Məqalədə daha sonra qeyd olunur ki, Rusiya son illərdə uğurlu maliyyə balansı yaratmağa nail olub. Bunun da nəticəsi olaraq, nüfuzlu reytinq agentlikləri və Beynəlxalq Valyuta Fondunun hesabatlarına görə, Rusiya “dünyanın ən sağlam iqtisadiyyatına malik ölkələr” sırasına daxil olub.
Məqalə müəlliflərinin fikrincə, bu nəticələrin əldə edilməsində düzgün idarəetmə və xüsusilə də Ukrayna ilə hərbi münaqişədən sonra Rusiya hökumətinin maliyyə sektorunda atdığı olduqca ehtiyatlı addımlar xüsusi rol oynayıb.
“Bloomberg” vurğulayır ki, Rusiya Putinin 20 ilik idarəçiliyi dövründə SSRİ-nin dünya üzrə itirdiyi nüfuzunun əhəmiyyətli bir hissəsini bərpa edə bilib. Məqalə müəllifləri xüsusi olaraq qeyd edirlər ki, məhz Putinin sayəsində bütün təzyiqlərə və təhlükələrə baxmayaraq, Rusiya Krım yarımadasını öz ərazisinə qata bilib.
Putinin daha bir önəmli uğuru isə odur ki, Rusiya ilk dəfə NATO üzvü olan bir ölkəyə təsir etmə imkanları qazanıb, hətta ona silah da sata bilib. Söhbət Suriya məsələsində Rusiya ilə Türkiyənin müəyyən anlaşmalar, razılaşmalar əldə etməsindən və bu NATÖ ölkəsinə “S-400” Zenit Raket Komplekslərinin satışından gedir.
Putinin uğurları sırasına həmçinin Rusiyanın Çinlə əlaqələrinin xeyli dərəcədə gücləndirilməsi və Suriya məsələsində əsas söz sahibinə çevrilməsi də əlavə edilib.
Bir sözlə, Qərb dairələrində və bütünlükdə dünyada məşhur olan nəşr Rusiya prezidentinin əksər Qərb siyasətçilərilə müqayisədə daha böyük uğurlara imza atdığını etiraf edir. Ancaq bu uğurların bütünlükdə dünyaya, xüsusilə də Rusiyanın yaxın qonşu ölkələrinə hansı təsirlər göstərdiyindən söz açılmır...