Özbəkistanın mərhum prezidenti İslam Kərimovun qızı Gülnarə Kərimovanın işi üzrə növbəti məhkəmə prosesi başlayıb. Bu barədə məlumat G.Kərimovanın qızı İman Kərimovanın “İnstagram”dakı hesabından (iman.k17) paylaşılıb. İman Kərimova hələ ötən il noyabrın 30-da elan etmişdi ki, şəxsi hesabını bundan sonra qardaşı və ailənin hüquqşünasları idarə edəcək. Məhkəmə ilə bağlı son məlumat da onlar tərəfindən ictimailəşdirilib.
Məlumatda deyilir ki, bu, G.Kərimovaya qarşı artıq 4-cü cinayət işidir. Və məqsəd onun fiziki cəhətdən tam məhvinə nail olmaqdır.
Özbəkistan Ali Məhkəməsinin mətbuat xidməti Daşkənddə Gülnarə Kərimovanın işi üzrə yeni məhkəmə prosesinin başladığını və məhkəmənin bağlı qapılar arxasında keçirildiyini təsdiqləyib.
G.Kərimovanın vəkili Qrequar Manja və qızı İman Kərimova bu cinayət işi üzrə təhqiqatın başladığını hələ ötən il senytyabrın 16-da açıqlamışdılar. Həmçinin bildirmişdilər ki, Kərimovlar ailəsinin tutduğu vəkillər prosesə buraxılmır.
İman Kərimovanın dediyinə görə, ailəsi tərəfindən tutulan 5 vəkili iş materiallarını yaymamaq barədə sənədə imza atdırıblar. İki vəkilə isə eşitdiriblər ki, fəallıq etəsələr, lisenziyalarını itirəcəklər.
Hələlik Özbəkistan mətbuatında proseslə bağlı hər hansı məlumat yayılmayıb. Lakin Özbəkistan Baş Prokurorluğu yanvarın 6-da G.Kərimovaya qarşı yeni cinayət işinin istintaqının tamamlandığını və işin məhkəməyə göndərildiyini bildirmişdi.


İman Kərimova

Qurumdan verilən məlumata görə, bu dəfə Kərimova və daha bir neçə nəfər mütəşəkkil cinayətkar dəstənin yaradılması, xarici ölkələrdə çirkli pulların yuyulması və büdcə vəsaitlərinin mənimsənilməsi ilə əlaqəli cinayətlərdə ittiham olunur.
İstintaq müəyyən edib ki, Özbəkistanın sənaye müəssisələrində G.Kərimovanın mütəşəkkil cinayətkar qrupları fəaliyyət göstərib. O, həmçinin ayrı-ayrı vətəndaşlara və müxtəlif şirkət sahiblərinə təzyiq göstərib, onları öz əmlaklarını nəzarətində olan şirkətlərin adına keçirməyə məcbur edib.
2017-ci ildə atası İslam Kərimovun ölümündən sonra Gülnarə Kərimova Özbəkistanda 10 il müddətinə azadlıqdan məhrum edildi. O, vergidən yayınmada, mənimsəmədə, offşor şirkətlərin sənədlərini məhv etməkdə təqsirli bilindi.
Özbəkistan keçmiş prezident qızı ilə bağlı cinayət işini G.Kərimova ABŞ-da və bir sıra Avropa ölkələrində korrupsiya və çirkli pulların yuyulması kimi, cinayətlərdə təqsirləndiriləndən sonra başladı.
2017-ci ilin 28 iyununda Özbəkistanın Baş Prokurorluğu Gülnarə Kərimovaya aşağıdakı ittihamlar üzrə cinayət işinin açıldığını elan etdi – dələduzluq, xarici valyutanın gizlədilməsi, gömrük qanunvericiliyinin pozulması, ticarət və xidmət qaydalarının pozulması, sənəd saxtalaşdırılması, cinayət fəaliyyəti ilə əldə olunan gəlirlərin qanuniləşdirilməsi.
Xanım Kərimovaya qarşı ittihamlar cinayətkar qruplaşma üzvlərinin, şahid və zərərçəkənlərin ifadələri, eləcə də qrupun nəzarətindəki 14 firma və 16 offşor şirkətin fəaliyyətinə dair materialların yoxlanılması əsasında irəli sürüldü. 12 xarici ölkədə G.Kərimovaya məxsus cinayət yolu ilə qazanılmış və dəyəri 1,5 milyard dollardan çox olan aktivlər aşkarlandı.



İstintaqın məlumatına görə, G.Kərimova Özbəkistanda mobil rabitə lisenziyalarının zəmanətli verilməsi qarşılığında telekommunikasiya və digər şirkətlərdən (əsasən xarici şirkətlər: MTS, “Vımpelcom”, ING, “Telia Sonera”) təxminən 1 milyard dollar rüşvət alıb. Sonralar o və yaxın ətrafı bu pulları offşor şirkətlər vasitəsilə xaricə daşıyıblar. Və dünyanın müxtəlif bölgələrində onlarla villa və digər əmlak satın alıblar.
Ölkədən çıxarılan pulların bir hissəsi – təxminən 555 milyon dollar İsveçrədəki hesablarda, təxminən 200 milyon dollar isə başqa ölkələrdəki hesablarda aşkarlanıb. İndi Özbəkistan hakimiyyəti bu pulları ölkəyə qaytarmağa çalışır.
İlk hökümdən sonra Gülnarə Kərimova bir müddət ev dustaqlığında qalıb. Lakin 2019-cu ilin martında onu ev dustaqlığı şərtlərini pozmaqda ittiham edərək Daşkənd vilayətindəki həbsxanaya göndəriblər. Həmin vaxt Özbəkistan Prokurorluğu bəyan etmişdi ki, G.Kərimova yaşadığı yeri tərk edib, həmçinin internetdən istifadə edib.
Kərimova özü və qızı qaydaları pozmaqla bağlı ittihamları rədd etmişdi. Çox keçmədən G.Kərimovanın barəsində ikinci cinayət işi açılmışdı.
2017-ci ilin dekabrında ABŞ Maliyyə Nazirliyi G.Kərimovanı “Qlobal Maqnitski qanunu” sanksiya siyahısına saldı. Nazirlik bəyan etdi ki, Gülnarə Kərimova dövlət subyektlərini cəlb edən, bazarları inhisara götürən, rüşvət tələb edən, hədə-qorxu gələn güclü mütəşəkkil cinayətkar dəstəyə rəhbərlik edib…