2025-ci ilin avqustuna olan məlumata görə, Rusiya ordusunun Ukraynada itkiləri təxminən 219 min nəfər təşkil edir.

Bu barədə “Meduza” və *“Mediazona”nın birgə araşdırmasında açıqlanıb.

Jurnalistlər miras işləri reyestrini və könüllülərlə birlikdə aparılan ölənlərin siyahısını təhlil ediblər. Nəticələr göstərir ki, son illərdə Rusiyanın döyüş itkiləri kəskin şəkildə artıb:

-2023-cü ildə – təxminən 50 min hərbçi,

-2024-cü ildə isə artıq 93 min nəfər həlak olub.

2024-cü ilin noyabrında həftəlik itkilər 3 min nəfərə çataraq, kişi ölümündə rekord göstərici qeydə alınıb. “Mediazona”nın məlumatına görə, həmin dövrdən etibarən Rusiya məhkəmələrinə “itkin düşmüş” və ya “həlak olmuş” kimi tanınma barədə kütləvi müraciətlər daxil olub.

Avqustun sonuna qədər BBC Russian, “Mediazona” və könüllülərin topladığı siyahıya əsasən, 125 681 rus hərbçisinin adı müəyyənləşdirilib. Lakin bu rəqəm bütün itkiləri əks etdirmir, çünki ölənlərin hamısı barədə açıq məlumat mövcud deyil.

Rusiya hakimiyyəti indiyədək müharibədə öldürülən və yaralananların rəsmi statistikasını açıqlamayıb. Qərb mediası isə kəşfiyyat məlumatlarına istinadən yazır ki, ümumi itkilər hər iki tərəf üzrə 1 milyon nəfərə yaxınlaşır və Rusiya daha ağır itkilər verib.

Press-fakt