"Albert Gəncinski” azadlıqda -
“Lotu Quli” ilə müharibəyə başlayır
Kriminal aləmdə “Albert Piterski”, “Albert Rıjiy”, “Albert Gəncinski” kimi tanınan qanuni oğru Əli Heydərov azadlığa çıxıb.
"BakuPost"un xəbərinə görə, Ə.Heydərov cəza müddətinin başa çatmasına 13 ay qalmış azadlığa buraxılıb.
O, "Lotu Quli" kimi tanınan qanuni oğru Nadir Səlifovun qəddar düşmənlərindən sayılır. Məhz “Lotu Quli” onun qanuni oğru adının alınması ilə bağlı “praqon” verib.
Hazırda Albert güc toplayır. Onun yaxın günlərdə N.Səlifova qarşı müharibəyə başlayacağı gözlənilir. “Albert”ə mərhum Rövşən Lənkəranskinin tərəfdarı olan kriminallar da dəstək verəcək.
Qeyd edək ki, Əli Müseyib oğlu Heydərov 1981-ci il fevral ayının 2-də Gəncədə anadan olub. Ona “qanuni oğru” adını 2012-ci ildə Sankt-Peterburqda avtoritetlər Merab Mzarelua və Kardava qardaşları verib. "Ded Xasan" klanında yer alan "Albert Rıjıy" Rusiyanın Şimal-Qərb regionu üzrə “smotryayuşi” təyin edilib.
"Ded Xasan"ın qətlindən sonra da (2013-cü ilin yanvar ayının 16-da öldürülüb) klana sadiq qalıb. O, Rusiya vətəndaşı ilə evlənib və iki uşağı Arxengelskdə qeydiyyatdadır. Bu səbəbdən Ə.Hüseynov həm də "Albert Arxangelsk" kimi tanınır. O, bir neçə il əvvəl Türkiyədə qətlə yetirilən “qanuni oğru” Rövşən Lənkəranski ilə də düşmən münasibətdə idi.
Onun "Lotu Quli" ilə münasibətlərinin hansı səbəbdən pis olduğu bilinmir, çünki onların hər ikisi "Ded Xasan" klanı ilə yaxın əlaqələrə malik olublar. 2014-cü ildə isə "Albert Rıjı"ya sui-qəsdlə bağlı Sankt-Peterburqda keçirilən məhkəmədə əsas sifarişçi kimi "Lotu Quli"nin adı hallanırdı.
Rəsmi ittihamda bildirilirdi ki, 2014-cü ilin mart ayının 18-də iki killer Alberti öldürmək məqsədilə onun yaşadığı evin ətrafında pusqu qurub. Moskva qeydiyyatlı "Audi"də öz qurbanını güdən killerləri yaxınlıqda daha bir avtomobil gözləyib. ”Kalaşnikov" avtomatı və iki tapança ilə silahlanan muzdlular məqsədlərinə çata bilməyiblər. Polis azərbaycanlı avtoriteti qətlə yetirmək istəyənləri həbs edib. Polis bölməsində məlum ki, həbs edilənlər Naberejnıy Çelnı vilayətində qeydiyyatda olan Aleksey Şparuta və Ruslan Koryaqindir.
Rusiya mətbuatı o zaman yazırdı ki, həbs edilənlər deyiblər ki, azərbaycanlı “vor zakon”un qətlinin sifarişini Peterburqda yaşayan bir nəfərdən alıblar. Bir neçə gün sonra sifarişçi - Gürcüstanda anadan olmuş 32 yaşlı İlham Hacıyev də həbs edilib. “Hamlet” ləqəbi ilə tanınan avtoritet əvvəl təslim olmaq istəməyib və yaşadığı mənzilin balkonundan qaçmağa cəhd edib. İkinci mərtəbədən düşmək istəyərkən polislər ona pnevmatik silahdan atəş açaraq yaralayıblar. Yüngül xəsarət aldığından səhəri gün onu istintaq təcridxanasına aparıblar. Sifarişdə "Lotu Quli"nin qohumunun adının hallanması kriminal aləmin diqqətini dərhal bu mövzuya yönəltdi. "Albert Rıjıy" Piterdə “sxodka” keçirdi və sifarişçi kimi Qulinin adını hallandırdı. Bu isə geniş müzakirəyə səbəb oldu, aralarında münasibətləri daha da kəskinləşdirdi. Bu məsələ ilə bağlı keçirilən “sxodka”da iştirak edən Aliksey Qudına (Lexa İrkutski)" Albert Rıjı"ya sui-qəsdə həmyerlisi Qulinin adının hallandırmasına etiraz edir. Qudına iddia edir ki, sui-qəsd məsələsini "Albert Rıjıy" özü polisdəki adamlarının dəstəyi ilə quraşdırıb.
Məhkəmədə hakim sui-qəsd cəhdinin kimlər tərəfindənsə təşkil olunduğuna və hazırlandığına dair ittihamın əsassız olduğu qənaətinə gəlib. Nəticədə sui-qəsdin təşkilatçısı kimi ittiham olunan İlham Hacıyevə tam bəraət verilib. Muzdlu qatillər hesab edilənlər də bəraət alıb.
2018-ci ilin martında isə "Lotu Quli"nin İstanbuldan Moskvada yerləşən “Medvedkovo” həbsxanasında yatan Əli Heydərova şəxsən zəng etdiyi barədə məlumat yayılmışdı. Quli onun "qanuni oğru" adının əlindən alındığını bildirib. O, "Albert Rıjıy"a bildirilib ki, həbsxanada "qanuni oğru" adı altında yatmayacaq.
Məlumata görə, bundan sonra postsovet məkanının nüfuzlu qanuni oğruları Andrey Miroyedov (Mirıç), Qiya Meoporiya (Qiya) və Saçino Qeqeçkori (Saçino) Quliylə telefon söhbətlərində Albertin "qanuni oğru" adının geri qaytarlmasını xahiş ediblər. Quli isə cavabında bildirib ki, onun verdiyi qərar əsaslıdır və geri dönüşü yoxdur. Rusiya mətbuatının ən son məlumatına görə isə Albert həbsxanada “qanuni oğru” kimi tanınıb və bu məsələdə Piterli “qanuni oğru”lar ona dəstək verib.